اترددت كتيييييييير قبل ما أكتب عن الموضوع دة ... يمكن كل سنة بيحصل موقف مستفز يخليني عايزة أتكلم , لكن بعد شوية بقرر الصمت , مش عشان الموضوع مايستاهلش "لأنه موضوع مهم جداً وخطير جداً" ومش عشان منطقة حساسة والكلام عنها لازم يكون بحساب ... بس المهم إني ماكنتش بحب أتكلم عن الفتنة الطائفية بين المسلمين والمسيحيين ... لأني كل مرة كنت بسأل نفسي سؤال عُمري ما لقيتله إجابة حتي الآن ... مين المسلمين والمسيحيين اللي بيتكلموا عنهم دول ؟!! أنا مثلاً "علي أساس إني مسلمة" ؟! و"نرمين" صاحبتي "علي أساس إنها مسيحية" ... طيب , كدة إحنا عرفنا "معطيات" المعادلة (مسلم ومسيحي) ... نحاول بقي نحلل الموضوع عشان نعرف سبب الفتنة الطائفية بيننا ... من الأول خالص كدة ومن أبعد نقطة في تاريخنا (أنا ونرمين) ... بنتين صغيرين أول مرة يروحوا المدرسة , بالصدفة البحتة قعدوا جنب بعض علي "دكة" واحدة .... اتعرّفوا , اتصاحبوا , ومن ساعتها وهما كل سنة بيقعدوا جنب بعض لحد آخر يوم في المدرسة .... نرمين أصلها أوّل صديقة في حياتي , بالأرقام يعني نطلع أصحاب من ييجي 17 سنة !! ... زمان , كنت في العيد بتاع نرمين (ما كنتش ساعتها عارفة إن فيه كريسماس ولا عيد قيامة ولا حد السعف , كل اللي كنت أعرفه إن فيه أعياد نرمين وأعيادنا) , وكنت بروح أقف قدام الكنيسة يوم عيد نرمين بعد الصلاة (القدّاس يعني) عشان لما تخرج نقف شوية مع بعض ونلعب سوا (أنا ونرمين وماريان وماري ومينا ويعقوب ... أصحابي في المدرسة) ... كنا مع بعض في كل المواد والحصص , ماعدا حصة الدين ... أيوة فهمت إن كل واحدة مننا لها دين مختلف عن التانية ... أيوة بقينا بنتكلم عن الإسلام والمسيحية , أيوة بدأت أفهم إن فيه اختلافات .... بدأت أتقبل إن نرمين في حصة الدين بتنزل تحضر في فصل تاني , وآخر السنة بتمتحن امتحان تاني ... وبعد الحصة , وبعد الامتحان , بنستني بعض عشان نروّح سوا (أصلنا كنا ساكنين قريّب من بعض ) لما كبرنا شوية , كان أوّل تليفون يجيلي في العيد "بتاعنا" من نرمين , وكنت حافظة أعياد نرمين عشان أكون برضه أول واحدة أتصل بيها في أعيادها ... كنت في عيد ميلادى لازم يكون فيه حاجات "صيامي" عشان بتبقي نرمين صايمة , وكانت أجمل هدية جتلي ولسة فاكراها ومحتفظة بيها من نرمين (جابتلي كلب لعبة لأنها عارفة إني بحب الكلاب جداً ... وكان "أمّور أوى" وعنده فرو أبيض في بنى ناااااعم ... كان بوبى عسّول جداً ) ... مش فاكرة أبداً إن خلال ال 17 سنة اللي فاتو (مدة صداقتي بنرمين) جت مناسبة وماكناش مع بعض فيها , حتي لما دخلنا كلّيات مختلفة ... أصل العلاقات القوية دى مش ممكن تتأثر ولا تضعف مهما طال الزمن ومهما زادت المسافات بيننا نتيجة تعدد الطرق في الحياة بس كدة أنا برضه ما وصلتش لحل !!! ما عرفتش المقصود بالفتنة الطائفية !!! ولا عرفت ليه بيقولوا وحدة وطنية وكلام كبير من النوع دة !!! دة أنا أصلا مابقيتش عارفة قصدهم إيه بالمسلمين والمسيحيين !!!! أنهي مسلمين وأنهي مسيحيين ؟!! أكيد مايقصدونيش أنا ونرمين ولا ماريان وماري وليلي ومروة ... ولا محمود وماجد وريمون وأحمد ... ولا أساتذتي في المدرسة اللي كانوأ أجمد مدرسين في الدنيا مستر ماجد ميخائيل وأستاذ سمير جرجس وأستاذ عماد عريان وأستاذ بيشوى !!! ولا "طنط" إقبال اللي كانت معانا في سويسرا وهيا اللي بتقول لنا ماتاكلوش من الأكل دة عشان مش حلال (مش مذبوح علي الشريعة الإسلامية) بس كلوا من دة عشان دة حلال أو نباتي أو فول صويا ... طيب يمكن قصدهم المسلمين اللي قابلتهم في كنيسة العذراء في بني سويف لما رحت أزور الكنيسة (من معالم المدينة هناك) وأخذنا صور جميلة أوى , وكان المسيحيين أهل الكنيسة اللي مانعرفهومش بيضحكولنا ويرحّبوا بينا .... بالظبط زى المسيحيين اللي كانوا في الكنيسة يوم إكليل نرمين ... كانوا بيرحّبوا بيا وبماما ... وكان أجمل فرح حضرته (رغم إني كنت قلقانة إن الناس تتضايق من وجود محجبات في الكنيسة) بس حقيقي استقبلونا بكل حفاوة وود ... طيب أعمل إيه دلوقتي ؟!! أنا تهت !! مش عارفة مين المسلمين والمسيحيين اللي بيتكلموا عنهم ؟!! ماهو مش باقي ناس تانية !! يبقي مين اللي بينهم خلاف وفتنة ؟!! مين اللي عايزين يبقي فيه بيننا صراعات ؟!! مين اللي بيقتلواْ الأبرياء ويغتالوا فرحتهم بالعيد ؟!! مين اللي عايز يقتل كل حاجة حلوة وكل ذكرى سعيدة ؟!! مين الجاهل اللي مش عارف إنه مهما حاول ومهما عمل عمره ما هايقدر يشوّه أو يخرّب علاقتنا ببعض ؟! مين اللي مش فاهم إن العلاقات بيننا دي أقوى من قنابله واغتيالاته وإرهابه ؟! ...
أكيد مش إحنا
فدوى نزار
