زمان , ماكنتش بحب أتكلم عن موقفي من الزواج , ليه ؟ لأني عارفة إنه موضوع ممكن تغيير الرأي بخصوصه طبقاً للمرحلة العمرية ومدى النُضج والتجارب الحياتية ... يعني, كل وقت ممكن يؤدي إلي وجهة نظر مختلفة .... ليه دلوقتي قررت أكتب عنه بحرية (مؤخراً يعني) ؟ ببساطة لأني وصلت لمرحلة الثقة في رأيي ... أصبح موقفي راسخ وقوي وصعب التغيير حتي في المراحل القادمة من عمري , إن كان ليا عمر
يمكن أي قرار مصيري في الحياة بيبقي صعب , ومحتاج تفكير وتحليل وتدقيق , ودة فعلا اللي حصل ... السؤال المبدأي , ليه البنت "مفروض" تتجوز ؟
1- عشان أهلها مش باقيين لها !! ... طيب ما ممكن تتجوز وجوزها نفسه يموت ويكون مش باقيلها هوة كمان , ويا سلام لو كانت خلّفت منه , يبقي مات وساب لها العيال كمان تشيل مسئوليتهم , دة غير إن بدل ما تحزن علي أهلها بس هاتحزن علي جوزها كمان
2- عشان يبقي عندها "راجل" يشيل مسئوليتها !!... الأيام دي البنت بعون الله شايلة مسئولية نفسها كويس جداً ولم يعد وجود "الراجل" مسألة حياة أو موت بالنسبة لها بالعكس دة الزوج ما هو إلا مسئولية جديدة تضاف علي قائمة المسئوليات اللي البنت هاتشيلها , البيت والعيال والزوج والشغل
3- عشان ما تفضلش طول عمرها وحيدة !! ... بيتهيألي وحيدة وبالها مرتاح أحسن من إنها تعيش مع واحد ممكن يحول حياتها لجحيم مقيم وتقضي عمرها خناقات ومشاحنات ووجع دماغ
4- الكينج بقي , اتجوزي عشان تبقي أم !! ... سبب كوميدي الحقيقة , ببساطة لأن ممكن ربنا مايرزقش البنت بنعمة الخلفة , ويبقي ساعتها أخدت مقلب العمر , اتسجنت مؤبد مع واحد كان بالنسبة ليها مجرد جهاز تفريخ , والمؤبد هنا مش 25 سنة لأ , دة طول العمر لحد ما واحد منهم ييجي أجله
5- هايفسّحك ويوريكي الدنيا !! ... لأ معلش , دة أنا لما هاحب أشوف الدنيا لازم أستأذنه , وهوة يرفض أو يقبل (حقه طبعا) بس ممكن يرفض بدون أي سبب مقنع , ومش بس يرفض ييجي معايا لأ دة يرفض إني أخرج أو أسافر, أو هايوافق ويفضل كل 3 دقايق يتصل روحتي فين وجيتي منين واتأخرتي ليه ... بالإضافة لأن برضه الزمن دة البنات منغير ما تتجوز بتخرج وتتفسح وتشوف الدنيا ... بالعكس دة الجواز هو نهاية مرحلة الفسح بالنسبة للبنت
6- الجواز سنة الحياة !! ... مين اللي حط السُنن الحياتية دي ؟ إحنا , البشر , يعني رسمنا خطوط وأجبرنا أنفسنا علي المشي عليها بحذافيرها
7- الجواز نص الدين !! ... بالنسبة لي مستعدة أعمل علي تحسين النص الأولاني ولما (بفضل الله) أصل للتقوى والاستقامة والهداية من عند ربنا أبقي وقتها أحس إن النص الأول اكتمل وباقي النص التاني (دة بالإضافة لأني مش مقتنعة إطلاقا بالمقولة دي) مفيش حاجة أبدا ممكن تكون نص دين لأي حد
8- اتجوزي عشان نفرح بيكي !! ... أكيد نفسي أفرّح أهلي بكل الطرق الممكنة , لكن مش عشان هما يفرحوا ليلة أنا يتنكّد عليا بقية حياتي
طيب بلاش أسباب الزواج , خليني أفكر في مواصفات الزوج المناسب
1- شكله حلو ( دي مش رقم واحد بس هامشيها واحد يعني) .. طيب ما ممكن تحصل له حادثة ويتشوه
2- غني ... الأيام دي مفيش أي حاجة مستقرة , ممكن يفلس الصبح
3- جدع ... للأسف الجدعنة دي مسألة نسبية , ممكن يكون جدع مع الناس كلها ويستندل معايا علي أساس إن زيتنا في دقيقنا
4- ابن ناس ... مش بالضرورة إنه يكون كويس لمجرد إن أهله كويسين , يخلق من ظهر العالم فاسد والعكس
5- متفهم ومتفتح ... سبحان مغير الأحوال , في لحظة ممكن الحاجات اللي كان فاهمها ومتقبلها , تتحول لوقود كل الحرائق الأسرية القادمة
6- ذكي ومتعلم تعليم عالي ... غالباً الولد دة هايبقي عايز يتجوز بنت ذكية ومتعلمة برضه , وبالتالي هايبقي بينهم صراع أزلي لو حس أو تخيل إن نجاحها بيزيد وممكن يطغى علي نجاحه , وهاتبدأ مرحلة تثبيط العزائم وبيتك أولي بيكي وإيه لازمة الشهادات والمذاكرة
كدة التفكير مش هايخلص , وكل الأسباب والمبررات اللي بيقودها المجتمع عشان يحاول يوضح ضرورة الزواج ما هي إلا حجج واهية وأسباب غير مقنعة ولا منطقية ومجرد كلام فارغ ليس له أي أساس من الصحة
إذاً .. هل الزواج كمبدأ مرفوض من أساسه وتجربة فاشلة بكل المقاييس ؟ ... لأ طبعاً , لأن كل إنسان تختلف آراؤه وتوجهاته عن الآخرين وبالتالي ممكن ناس تقتنع بكل الأسباب السابقة وتحيا سعيدة ... لكن بالنسبة لي , السبب الوحيد اللي ممكن يؤدي لأني أُقبل علي خطوة الزواج هو فقط "الحُب" .. الحُب هو ما يجعل كل مصاعب الحياة تهون , يجعل عيوب كل الأطراف غير مرئية ... الحب وحده يكفي لجعل العالم أجمل
باختصار , وبعد أكثر من ربع قرن حياة في هذا العالم , وبعد كل لقاءات الصالونات أو حتي المطابخ , أدركت نهاية واحدة بسيطة جداً, أني لو لم أحب , فلن أتزوج
للعلم رقم واحد في صفات العريس بلا منازع هي التدين ... وهي رقم واحد في الحب كمان , مش هأتمن حد أو أثق في إنه بيحبني لو ما كانش بيحب ربنا وحريص علي دينه
إذاً .. هل الزواج كمبدأ مرفوض من أساسه وتجربة فاشلة بكل المقاييس ؟ ... لأ طبعاً , لأن كل إنسان تختلف آراؤه وتوجهاته عن الآخرين وبالتالي ممكن ناس تقتنع بكل الأسباب السابقة وتحيا سعيدة ... لكن بالنسبة لي , السبب الوحيد اللي ممكن يؤدي لأني أُقبل علي خطوة الزواج هو فقط "الحُب" .. الحُب هو ما يجعل كل مصاعب الحياة تهون , يجعل عيوب كل الأطراف غير مرئية ... الحب وحده يكفي لجعل العالم أجمل
باختصار , وبعد أكثر من ربع قرن حياة في هذا العالم , وبعد كل لقاءات الصالونات أو حتي المطابخ , أدركت نهاية واحدة بسيطة جداً, أني لو لم أحب , فلن أتزوج
للعلم رقم واحد في صفات العريس بلا منازع هي التدين ... وهي رقم واحد في الحب كمان , مش هأتمن حد أو أثق في إنه بيحبني لو ما كانش بيحب ربنا وحريص علي دينه
فدوى نزار
5 comments:
طيب الحب يخليكى تقبلى كل اللى اتقال فوق ده؟
أولا أحييكى على وصولك لأفكار خاصة بيكى وانتى مقتنعة بيها
ثانيا لو تسمحى لى أرد على بعض النقط للمناقشة مش بقصد الجدال
بالنسبة للأسباب:
2- انا معاكى ان المجتمع اختصر البنت فى روحها متعلقة بالرجل اللى هو صعب تلاقيه واحد يستحق لكن جزئية المسؤلية دى مش هتبقى جديدة على البنت بس...هى
فعلا مسؤولة منه يحقق لها الامان والرعاية والحب والانفاق حتى لو هى بتشتغل (متحطيش حتت الشغل دى اوى عشان مش كل البنات بتتشتغل) ووقتنا الحاضر جحيم
بالنسبة للرجل..مسؤولية رهيبة وانتى عارفة طبعا الظروف اللى البلد فيها.
3- عشان متبقاش وحيدة: ليه فرضتى ان الرجل ده خناقات ووجع دماغ...توقعى الأفضل بإذن الله يجيلك..بلاش تختصرى دايما الرجال فى الامثلة السيئة.
4- مؤبد؟ يا ساتر يا رب :) على فكرة انا اعرف ناس مخلفوش وفى منتهى السعادة وبيتخانقوا وفى منتهى السعادة بردو
5-موضوع الخروج والفسح: بصى محدش بيكره السعادة ووقت الترفيه..المشكلة ان ساعات احد الطرفين بيختار وقت يرفه فيه عن نفسه فى حين الطرف التانى عنده
مشكلة فبيحصل صدام...مشكلة توقيت يعنى..وبردو الاهتمام الزايد مش كويس وعندك حق لكن مفيش مانع أطمن عليكى خصوصا محدش ضامن نفسه اليومين فى
الشارع واللى فيه...بكلمك فى التليفون عشان بحبك وخايف مش عشان بتحكم فيكى واضايقك.
6-الجواز سنة الحياة...مش اللى حطها البشر دى سنة الله فى كونه عشان النوع يفضل موجود فملهاش علاق لا بعادات ولا اختراعات مجتمعية.
7-نص الدين ده حديث شريف مش مقولة وليه مغزى ومعنى بردو انا مش هتكبه انتى دورى عليه وابحثى :)
8- هههههه معاكى تماما فى دى
بالنسبة للجزء التانى بتاع المواصفات:
رقم 6 بس اللى فيها كلام...انتى اتكلمتى على الرجل "المأنتخ" اللى بدل ما يحسن من نفسه عشان يبقى ناجح زى زوجته لا ده بيعطلها عشان تبقى زيه لكن فى الحقيقة
وجهة نظرى الشخصية ان البنت الشغل بالنسبة لها فى خط حياتها لازم يقف فى فترات معينة بمعنى الشغل زى sine wave كدا..يعنى اول الزواج عادى الشغل
لكن اول ما يجى طفل هيبقى محتاج منها رعاية ومجهود اكبر من الرجل واول ما الطفل ده يكبر شوية ممكن ترجع الشغل تانى...وبردو شغل البنت لازم يبقى ليه
مواصفات..يعنى مش بعيد عن البيت ومش مرهق ومفهوش مشاكل كتيرة يعنى كماليات لان دورها هى أسرتها مش شركتها...كلامى ممكن يكون بالنسبة لك مش ظريف
بس بصى له من وجهة نظر احنا اتخلقنا ليه واية دور كل واحد هتفهمى قصدى.
أنا عمال أقرا الكلام وأقول مفيش امل خالص كدا؟!! واذا بالنهاية والحل وهو "الحب"..ربنا يرزقك الحب اللى يسعد قلبك :)
I am the same person who posted the detailed comment but I forgot to sign in by my blogger account, thanks.
مش عارفة ممكن يوصلكوا ردى واللا لأ , خصوصاً إنى مادخلتش على المدونة من زمان جداً وبالتالى لسة شايفة تعليقاتكم
ومبدئياً فرحت جداً إن فيه ناس عدّت على مدونتى وكمان أخدوا من وقتهم عشان يعلّقوا عليها ويشاركونى الحوار ... شكراً جزيلا
@Mohktar Adel ... الحقيقة أعتقد إن لو وُجِد الحب , مش هايحصل كل اللى فوق دة ! يعنى لو بحب حد وهو بيحبنى , مش هاعتبر سؤاله سيطرة أو تحكم مثلا , لأ هاعتبره اهتمام وقلق ... لو بحبه هابقى بعمل كل حاجة عشانه وأنا مبسوطة وبكامل إرادتى عشان أسعده , ومش هاشوف دة كتضحية , لأ هاشوف إنها حاجة قليلة تتعمل لإنسان بحبه ... بيتهيألى كدة يعنى , الله أعلم بقى , ماجرّبتش , ويمكن أكون غلطانة ودة مجرد كلام حواديت ... ربنا يستر
@Mustafa Nassef ... وجدتهاااا: عن أنس رضي الله عنه أن رسول الله صلى الله عليه وسلم قال: من رزقه الله امرأة صالحة فقد أعانه على شطر دينه فليتق الله في الشطر الباقي. رواه الطبراني في الأوسط والحاكم ومن طريقه للبيهقي وقال الحاكم صحيح الإسناد، وفي رواية البيهقي قال رسول الله صلى الله عليه وسلم: إذا تزوج العبد فقد استكمل نصف الدين فليتق الله في النصف الباقي. حسنه الألباني في صحيح الترغيب والترهيب.
شكراُ على الإفادة
هو الموضوع مش فقدان أمل يعنى , بس مجرد رغبة فى كسر قواعد وضعية فى المجتمع , ... نفسى أشوف الناس باصة للجواز بطريقة تانية غير الورقة والقلم وكراسة المواصفات .. يعنى مثلا عشان اتنين يبقوا أصحاب , ماحدش بيقعد يبحث فى مواصفات الآخر , لأ , فجأة كدة بيكتشفوا إنهم بقوا أصحاب , إمتى وازاى؟ توافق من عند ربنا , لا حد فيهم قام بإعداد مسبق ولا حد منهم هايسيب التانى عشان النيش ناقص طبق خُشاف ... نفسى الدنيا تبقى أبسط من كدة ومايكونش فيها العُقَد اللى بنحطها لأنفسنا
آمين يا رب العالمين :)
Post a Comment